Վանատուրի միտինգավորները վերջին լուրերն էին քննարկում. սեւծովյան սառը հոսանքների պատճառած վնասներից մինչեւ քաղաքական խեղկատակություններ:

Սասուն Միքայելյանի եւ մյուս բոլոր քաղբանտարկյալների ազատության համար պայքարող ժողովուրդը նույն համառությամբ կանգնած է. «Բա ո՞նց: Մեր դիրքերը չենք զիջելու, հլա մի բան էլ դենն ենք գնալու: Մի քանիսին արդեն բաց են թողել: Հատուցման ժամը մոտենում է, չէ՞: Վախից տակները... », - այ էսպես:

Կ.Հ.

====================================================================================

Անդրադարձ` տխրությամբ

Չլիներ Սամվել Գեւորգյանի ձերբակալությունը` այս հարցին ընդհանրապես չէի անդրադառնա:

«Ղարաբաղ» կոմիտեն հայ ժողովրդի պատմության մեջ կմնա ոչ միայն 1988թ.-ի համազգային շարժումը փայլուն ղեկավարող, Հայաստանին անկախության հասցնող, ԼՂՀ ինքնապաշտպանությունը հաղթանակով պսակող նվիրյալների մի խումբ, այլ նաեւ շարժումից քսան տարի անց նոր Համաժողովրդական Շարժման ձեւավորող ու Հայաստանի Հանրապետությունը ավազակներից ազատագրող կոմիտե: Ու պատահական չէ, որ «Ղարաբաղ» կոմիտեի բոլոր անդամները (բացառությամբ մեկուկեսի) համախմբվել են Համաժողովրդական Շարժման առաջնորդ Լեւոն Տեր-Պետրոսյանի կողքին: Ինչու՞ մեկուկես, որովհետեւ Վազգեն Մանուկյանը ինքնամոռաց պարում է իրեն «իդիոտ» անվանած իշխանությունների դուդուկի տակ, իսկ Դավիթ Վարդանյանը իրեն ամբողջությամբ նվիրել է բիզնեսին:

«Ղարաբաղ» կոմիտեի իրական անդամների միասնականությունը տեսնելով` միանգամից հանգում ես այն եզրակացությանը, թե ով էր պատահականորեն հայտնվել կոմիտեում: Այդ երկուսը նույնիսկ չնչին բարոյականություն չունեցան մարտի 1-ի դեպքերից հետո կանգնել ժողովրդի ու իրենց թեկուզեւ նախկին ընկերների կողքին:

Համեմատության սիրահարներին հիշեցնեմ, որ 1996 թվականի ընտրություններից հետո Վազգեն Մանուկյանի կողմնակիցներից որեւէ մեկի «մատը փուշ չմտավ», իսկ Վ.Մանուկյանի կողմից այսօր պաշտպանվող իշխանությունները մարտի 1-ին հազարավոր մարդկանց աչքի առաջ գնդակահարեցին տասը երիտասարդների:

Ինքներդ ձեզ չեք հարգում, գոնե հարգեք ձեր անցյալը ու նաեւ նրանց, ովքեր մի որոշ, բայց կարճ ժամանակ հավատացել են ձեզ: Լուսահոգի Ռաֆայել Ղազարյանը իր մահվանից մի քանի օր առաջ հենց դա էլ ակնարկում էր...

Ա.Սարգսյան

---