Added (2008-03-30, 10:20 Pm)
---------------------------------------------
Առաջին հերթին գազարն արժեքավորվում է կարոտինի մեծ պարունակության շնորհիվ, որն օրգանիզմում վերափոխվում է հատկապես երիտասարդ կանանց համար շատ կարեվոր վիտամին A-ի: Ոչ մի ուրիշ միրգ կամ բանջարեղեն չի պարունակում այնքան կարոտին, որքան գազարը: Այս հարցում նրա հետ կարող է մրցակցել թերեվս միայն քաղցր բիբարը:

Ի դեպ, գազարի բաղադրության մեջ եղած կարոտինն էապես ավելի դյուրին կմարսվի, եթե այն ուտելիս գործածեք որոշ քանակությամբ յուղային զանգված, օրինակ` թթվասեր, բուսական յուղ եվ այլն:

Միեվնույն ժամանակ, գազարը հանդիսանում է C, B, D, E վիտամինների հիանալի աղբյուր: Այն հարուստ է նաեվ հանքանյութերով ու միկրոտարրերով, որոնցից են կալիումը, կալցիումը, երկաթը, ֆոսֆորը, յոդը, մագնիումը, մարգանեցը:

Գազարը պարունակում է նաեվ եթերայուղեր եվ ֆիզիոլոգիապես ակտիվ նյութեր` ստերոլներ, ֆերմենտներ եվ օրգանիզմին անհրաժեշտ այլ միացություններ:

Որպես բուժական սնունդ` գազարը հիմնականում գործածվում է բնական կամ հյութի վերածված վիճակներում: Օրգանիզմի վրա այն ունենում է բազմակողմանի ապաքինող ազդեցություն:

Գազարը ցուցվում է հետեվյալ դեպքերում

1. Ինչպես գազարի հյութը, այնպես էլ քերած գազարը ընդհանուր ամրապնդող ազդեցություն են ունենում օրգանիզմի վրա: Դրանք մաքրում են արյունը, օրգանիզմից դուրս են մղում տոքսիններն ու վնասակար նյութերը, կանոնակարգում են նյութափոխանակությունը, բարձրացնում բոլոր ներքին օրգանների ակտիվությունը: Գազարի գործածումը շատ օգտակար է ավիտամինոզների եվ սակավարյունության դեպքում:

2. Գազարն ակտիվացնում է ներբջջային թթվեցնող-վերականգնող պրոցեսները: Այն նպաստում է արյան մեջ գլխավոր հակաօքսիդանտների քանակության ավելացմանը, ինչի շնորհիվ ամրապնդվում է իմունային համակարգը (հատկապես երբ խոսքը գնում է տարեց մարդկանց մասին), ինչպես նաեվ խթանվում է առողջ բջիջների աճը եվ նվազում քաղցկեղով հիվանդանալու հավանականությունը:

3. Կալիումային աղերի մեծ պարունակության շնորհիվ գազարը շատ դեպքերում օգտակար է սիրտ-անոթային հիվանդությունների, աթերոսկլերոզի, բարձր ճնշման դեպքում: Ի դեպ, աթերոսկլերոզի եվ ստենոկարդիայով զուգորդվող կորոնար անբավարարության ժամանակ կիրառվում է նաեվ գազարի սերմերից պատրաստվող թուրմը` դաուկարինը: Այս պրեպարատն ունենում է շատ լավ սպազմոլիտիկ ազդեցություն եվ լայնացնում է սրտի անոթները:

4. Գազարի հյութը շատ օգտակար է երիկամների եվ լյարդի ֆունկցիաների խանգարման դեպքում. երիկամաքարային հիվանդության ժամանակ այն նպաստում է ավազի եվ ոչ շատ մեծ քարերի արտամղմանը, ինչպես նաեվ` լյարդի մաքրմանը:

5. Գազարը նաեվ կարգավորում է ածխաջրերի փոխանակումը, բարելավում մարսողության պրոցեսը, կանխարգելում փորկապություններն ու թութքը:

6. Համեմատաբար վերջերս գիտնականները հայտնաբերել են, որ ֆիտոնցիդների մեծ պարունակության շնորհիվ գազարը կարող է ազդել ախտածին միկրոֆլորայի վրա գրեթե նույնչափ արդյունավետ, ինչպես սոխը կամ սխտորը, որոնք այդ հարցում ճանաչված առաջատարներ են:

7. Գազարը կիրառվում է նաեվ տեսողական խաթարումների, վերին շնչուղիների կատարայի, ստոմատիտի, բերանի խոռոչի բորբոքային պրոցեսների դեպքում: Մասնավորապես` այն նպաստում է ակնաթաղանթի ամրացմանը: Աշնանը ակնային տարբեր հիվանդություններ ունեցող կանանց խորհուրդ է տրվում հաճախակի գործածել գազարի հյութ: Այն ավելի հեշտ է յուրացվում օրգանիզմի կողմից եվ հիանալի կերպով սնուցում է աչքերը: Եվ մի մոռացեք մի քանի կաթիլ բուսական յուղ ավելացնել հյութին, որպեսզի այն հաստատ ծառայի նպատակին:

Գազարի հյութի եվ մեղրի խառնուրդը գործածվում է անգինայի, ուժեղ հազի եվ խորխի ժամանակ կոկորդի ողողման համար: Իսկ գազարի հյութի եվ կաթի խառնուրդն օգնում է բրոնխիալ ասթմայի սրացումների ժամանակ:

8. Յոդի զգալի պարունակության շնորհիվ գազարի հյութը շատ հաճախ խորհուրդ են տալիս խմել վահանաձեվ գեղձի խաթարումների դեպքում: Աղցանների մեջ գործածելու դեպքում այն օգնում է պայքարել ճարպակալման եվ աթերոսկլերոզի դեմ:

9. Գազարն ունի հակաբորբոքային եվ վերքերն ապաքինող հատկություն: Ժողովրդական բժշկության մեջ մանր քերած գազարն ու վերջինիս հյութը քսում են այրվածքների, մաշկի ցրտահարված հատվածների, վերքերի եվ խոցերի վրա` դրանց բուժման համար:

Գազարի գործածման հակացուցումները

1. Խորհուրդ չի տրվում գազար օգտագործել բարակ աղիքի բորբոքումների, ստամոքսի եվ տասներկումատնյա աղիքի խոցային հիվանդության սրացման ժամանակ:

2. Գազարի եվ նրա հյութի չափից ավելի գործածումը կարող է հանգեցնել այն բանին, որ մաշկը, հատկապես` ափերի ու կրունկների, ստանա դեղնա-նարնջագույն երանգ: Դա խոսում է այն մասին, որ օրգանիզմը կարոտինի ավելցուկը չի վերամշակում վիտամին A-ի: Շաբաթական 5 բաժակ գազարի հյութի ընդունումն արդեն կարող է հանգեցնել մաշկային ծածկույթի թեթեվ դեղնման: Այս երեվույթն ավելի հաճախ նկատվում է երեխաների մոտ, քանի որ հասուն մարդու լյարդը ավելի լավ է մարսում կարոտինն ու դուրս մղում դրա ավելցուկն օրգանիզմից:

3. Խորհուրդ չեն տալիս գազար գործածել նաեվ վիրահատություններից հետո:

4. Ի վերջո, շաքարային դիաբետով հիվանդների սննդակարգում գազարը ներառվում է` հաշվի առնելով վերջինիս բաղադրության մեջ պարունակվող ածխաջրերի քանակը:

Գազարը գեղարարական պրակտիկայում

Վիտամին A-ի շնորհիվ, որն ընդունված է անվանել նաեվ «գեղեցկության վիտամին», գազարը համարվում է բնական կոսմետիկայի կարեվորագույն միջոց: Թարմ գազարից քամված հյութի պարբերաբար ընդունումն արդեն բավական է թարմ ու փթթուն տեսք ունենալու համար:

Միաժամանակ, գազարը` որպես գեղարարական միջոց, արդյունավետորեն գործածվում է նաեվ արտաքնապես` դիմակների տեսքով:

Ահա բոլոր տեսակի մաշկերի համար նախատեսված մի քանի դիմակների բաղադրատոմսեր.

3 հատ գունատ-վարդագույն երանգ ունեցող քերած գազար, 1 թեյի գդալ կարտոֆիլի ալյուր կամ կարտոֆիլի խյուս, 2 ձվի դեղնուց:

1 հատ քերած գազար, 1 ճաշի գդալ կաթ:

2 հատ բաց գույնի քերած գազար, 1 ձվի դեղնուց, մի քանի կաթիլ բուսական յուղ:

3 բաժին գազարի հյութ, 1 բաժին կիտրոնի հյութ:

Բոլոր դիմակները հարկավոր է պահել դեմքի վրա 20 րոպե, ապա լվանալ տաք ջրով:

Հիշեք, որ դիմակը քսելուց առաջ չոր եվ նորմալ մաշկերը հարկավոր է պատել քսուքով կամ յուղով:

Դիմակներ` նախատեսված չոր մաշկի համար.

2-3 հատ խոշոր գազար` եփած եվ տրորած, մեղր:

1 թեյի գդալ գազարի հյութ կամ 1 հատ քերած գազար, 1 թեյի գդալ թարմ կաթնաշոռ, 1 թեյի գդալ սերուցք:

Դիմակները պահել դեմքին 10-20 րոպե, ապա լվանալ տաք ջրով:

Դիմակներ յուղոտ մաշկի համար.

Մառլյան թրջել գազարի հյութով եվ փռել դեմքի վրա: Կարելի է նաեվ մառլյայի մեջ քերած գազար լցնել: 1 ամսվա ընթացքում շաբաթական 2-3 անգամ այս դիմակն անելու դեպքում մաշկը ձեռք է բերում թեթեվ մգություն, ինչպես արեվի լոգանքից հետո: Դիմակը քերած գազարով անելու դեպքում օգտակար է նաեվ, եթե մաշկն այրվել է արեվից:

1 հատ քերած գազար, 1 հատ հարած եվ փրփրեցրած սպիտակուց, այնքան ալյուր, որ ստացվի շիլայանման զանգված:

Դիմակները հարկավոր է պահել դեմքի վրա 20 րոպե, ապա լվանալ սենյակային ջերմաստիճանի ջրով:

Եթե մազերը դանդաղ են աճում.

Շատ օգտակար է գազարի եվ կիտրոնի հյութերի խառնուրդը: Եթե այն մերսելով ներծծեք գլխամաշկի մեջ, մազերն ավելի արագ կսկսեն աճել եվ ձեռք կբերեն գեղեցիկ փայլ:

Ուզում եք նիհարե՞լ.

Բուլղարացի բուժակ Պետր Դիմկովը մշակել է մարմնի զանգվածի իջեցման մի համակարգ, որն ամբողջությամբ հիմնված է գազարի վրա:

Թարմ հում գազարն անցկացնել քերիչով, ավելացնել մեղր, կիտրոնի հյութ եվ որեվիցե միրգ: Ստացված ուտեստը 3 օր շարունակ ուտել նախաճաշին, ճաշին եվ ընթրիքին: 4-րդ օրը սննդակարգը կարելի է համալրել տապակած կարտոֆիլով, հացով, խնձորով, իսկ 5-րդ օրն արդեն կարելի է անցնել բնականոն սնուցման:

Որ գազարը գնել

Գոյություն ունեն գազարի բազմաթիվ տեսակներ, սակայն գնելիս հարկավոր է իմանալ, որ առավել վիտամինացված գազարները կշռում են մոտ 150 գր: Որքան ավելի խոշոր է գազարը, այնքան այն ավելի լավ է ներծծում նիտրատները, հետեվաբար պետք չէ նախապատվությունը տալ գազարի մեծությանը:

Գազարի վերնամասը միշտ ավելի հարուստ է կարոտինով, քան ստորին հատվածը: Եվ, ի դեպ, գազարի կեղեվի եվ միջուկի մեջ էլ կարոտինի քանակությունն էապես ավելի շատ է`համեմատած մնացած մասի հետ: Այնպես որ, աշխատեք այս բանջարեղենը գործածել կեղեվով` մանրակրկիտ կերպով լվանալուց հետո, կամ գոնե մաքրեք միայն կեղեվի արտաքին բարակ շերտը: